Médam zé mésyé, la sosyété, mi pans zot i koné kozman-la é si mi rodi ali in énièm foi sé sorman ké sa i kol bien avèk la sosyété zordi épi avèk lo moun. In pé, mèm in bonpé, souvan dé foi zot déyèr lé tort alor si i fo désharj zot trop lin dsi ou, zot i ézit pa. Poitan, o final, kisa lé pèrdan ? Toulmoun. Kisa lé gagnan ? Pèrsone. Pou kosa ? Pars an fas out siséptibilité, néna la siséptibilité l’ot pèrsone. I pé di lo mèm zafèr pou l’amour prop : in l’amour prop i bite avèk in n’ot l’amour prop. Antansyon déga ! Lo pli pir sé ka n in moun lé varyab : in zour li lé mal o ki, l’ot zour li lé bone imèr. La plipar d’tan li koz avèk ou konmsi arien la éspassé, mèm si li la foute aou in bous ta gèl san rézon, in n’ot zour. Ké li obli sirtou pa, an fas li, néna in moun l’apré kalkil ali. Alé mi kite azot rofléshi la dsi é ni artrouv pli d’van. Sipétadyé.