Mésyé, Médam, La Sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mé zami kozman moin la mark an-o la, sa in kozman ni koné dopi lontan. Sans prop ? Lé pa difisil konprann é sak la fine oir in radmaré, sansa in tsunami I debark dsi in vil, sak la fine oir la mèr debark an paké dsi la rout litoral, sansa dann la vil Sin-Lé sansa ankor d’ot landroi I konpran toutsuit. Mé konm nou l’apré koz dsi in proverb ni konpran bien li néna d’ot zaplikasyon é si ni vé, an gro, sa i vé dir i gingn pa fé arien si i mète pa lo moiyin k’i konvien. Alé ! Mi kite azot rofléshi la dsi é ni artrouv pli d’van. Sipétadyé.