Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

« I bingn pa san mouyé ? »

In kozman pou la route

vandrodi 28 mé 2021, sanm Justin

Médam, Méssyé, La Sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami, kozman mwin la marke an-o la sa néna lontan mwin la antande. Biensir pa dan la boush in jenn moun, mé plito dann sète in moun té déza vyé konm Erode é d’apré la fasson, la di sa, mwin la konprann sa in patoi téi fé parti son vokabilère abityèl. Kossa sa i vé dire par l’fète ? Sin ploman ké toute sak wi fé néna son konsékans : si wi travaye tro, ou lé fatigué, si wi manze tro piman la douane i arète aou, sak i anbrass tro i manke lo trin…étsétéra, ètsétéra la ké lo ra. Mé si mi di azot la foi mwin la antann sa épi mwin la rozistr ali dsi mon disk dir sé kan mwin la pran pou mon konte dann sète afèr-la. Zot i koné lo kozman : afors i frékante, in zour i anfante é kan sa l’ariv amwin é ké mwin la di lo vyé madame, èl la larg amwin lo kozman. Zordi lo rézilta néna karantan, toute an fors é an boté, é kan mi plonj dann mon mémoir, mi pé dir azot mi rogrète pa-tan pi pou lo foutan. Alé ! Mi kite azot rofléshi la dsi. Sipétadyé.



Inn modékri, inn ti lavi, inn komantèr ?

signaler contenu


Facebook Twitter Linkedin Google plus