Mi koné pa si konm mwin zot la byin konpri sak lo prézidan la donn a nou konm lésplikasyon d’si son politik, sak li aminn dopi kat-r - an, an touka pou li “Sa va mié“. Sa i fé pans a mwin konm dann tan siklonn, koudvan lapré kass la kaz, anndan néna i zoué kart é pérsonn domoun i an sousi. Komansa lo péi i sava mié ? Ki pé krwar in nafèr parèy ? Pwatan sak lété an parmi dann lo lémisyon la télé la pa mank di a li.

Shomaz, parl in pé la d’si, vik sé sa lo boubou, pou ou i goumant ousinonsa i diminié ? Pou lèr pou li, ni dwa atann ziska la finn-d-lané vik li kont boukou d’si la lwa El-komri é boudikont, na war pou vréman son léfé la finn-d-lané. Konm bann la ot i di “sé la ou lo ba i blèss“ vik personn domoun i vé pa d’sa, ni lo travayèr, ni bann syndika, ni lo patron li minm. La mizèr i instal a li konm karapat d’si tété bèf a parksa sava mié.

Eské pou bann rotrété sava mié ? Eské pou bann moun na pwin la kaz sava mié ? Eské pou bann plantèr kann Larènyon koman i lé zot domin ? Bann koléktivité lé d’si l’ki ? Koté nou la minm, domann bann travayèr batiman si sava mié, nout bann zami maoré éské pou zot sava mié ? Sanm pou mwin, kèkpar lo prézidan na rézon, sava mié, i bouz, pou lèr i komanss byin bouzé, minm la nwuit i bouz !