Kissa la fote, si zot la rant dann in pti kok do boi pou travèrs la mèr ? Kissa l’otèr si landroi-la la mèr lé mové ? Kissa lé résponsab si lo kwasa-kwasa la ranvèrsé ?
Gouvèrnman fransé i di konm sa li lé « horrifié » : bien sir, pèrsone i an pèsh pa méssié Jego ète konm li di li-mèm. Pèrsone i pé pa anpèsh in pé vèrs bann larm krokodil déssi lo déstin amèr bann moun i sort dann z’ot landroi pou gingn la mor dann in bra-d’mèr kosté sanm Mayotte. Pétète mèm, in pé i di lo plan kont l’immigrasion ilégal lé pli inportan k’in bann kor dan la mèr la-ba kosté sanm Mayotte... I fé pa lomlète san kass dézèf ?
Moin la mèm tandi in pé dir konmsa : « Akoz zot i rès pa z’ot landroi ? ». Akoz ? Pars na poin l’avnir pou zot la-ba. Pars zot landroi la rès a-tèr par raport lo dévlopman. Akoz lané 1975, nana in puissans kolonialist, apré an avoir okipe lo péi pandan plis san’t’an la déside lès azot shapé san fé in n’afèr pou ède azot in pé. Akoz nana in pé bann z’avantirié, gosh konm droit, la lèss landroi san l’éspoir an avoir in vi in pti pé méyèr.
Alors, kissa l’otèr ? Si la pa tout sak la mète landroi-la dann in fo-train : tout ! La pa arienk in pé, anparmi nana La Frans : l’istoir lé la ! I défil pa an zourite dovan sa !

 Justin