Par raport l’ékonomi La Rényon, kèl kozman, moin konm zot, ni antann lo pli souvan é pa arienk dopi zordi ? Ni antann dir bann koléktivité kisoi bann komine, kisoi bann kominoté d’komine, kisoi konsèy départmantal épi konsèy réjyonal lé plizanplis oblizé sèr sintir. L’arzan nana moins an moins – l’arzan ofisyèl, mi vé dir pars l’arzan i marsjh annsou, sa i mank pa ! Mii antann mèm d’isi d’laba in pé i di, talèr nora pi l’arzan pou pèy RSA, talèr désèrtènn koléktivité sar blizé déklar fayite.

Alor, sé l’èr pou dépansé ? Sé l’èr pou komann bann gran shantyé ? O sinonsa sé l’èr pou diminyé la dépans sansa L’èr po fé myé avèk moins ? Sé l’èr pou dépans sak ou nana é pa po dépans sak ou na poin, sé l’èr pou fé in zèstyon an bon pèr d’famiy . Sé pa l’èr pou zète l’arzan par la fénète ? Konm pou la NRL san savoir si sa i fini ar-pa an katédral kasé, konm in sorti d’rout pou 600 milyon l’éro an mod Bélo ? Lé ga, soi banna lé kouyon, soi zot i fé lo kouyon, soi lé dé an mèm tan… é nou ni doi pèy l’adisyon.

Lé ga, sak nana konfyans dann Paul Verges, ékout amoin bien : nout kamarad, an parmi bann pli saz dann La Rényon zordi la di , pou son par li sava vote pou Lebreton. Son konfyans lé bazé dsi la rézon é li invite anou pou fé konm li. Alors, alon fé konm li. Sar tro tar aprèsa pou rogrété – I di pa, rogré i vien apré la mor ?