Mi koné pa si zot la suiv in pé tout lo trikmardaz dsi la NRL-di sinploman la rout an mèr. Mi koné pa si zot i souvien avèk kèl palaèksa, banna l’amenn lo shantyé a milyar san tyienbo kont l’avi bann komisyon lé la éksopré pou suiv bann gran travaye konmsa.

Biensir la pa dann pti plas moi néna mi sava rakont la vi insahévé léspès shantyé-la mé néna in kékshoz i fé lo vativien dann mon tète sé sak banna i apèl lo rosh masiv. Koman so rosh-la la fini par okip in plas o sant dann lo sousi bann moun i amenn shan tyé-la. Dabor pou kosa la komans anparl sa ?

Pou kosa la komans anparl sa pou di tèrlaba Sin-Lé néna lo bann rosh konm ki fo-donk masiv si zot i vé. Mi rapèl in tan l’avé di té bann rosh granitik téi fo mé sa la poin isi shé nou. Aprésa konm moin la di, la trouv laba dann Boi blan Sin-Lé bann rosh masiv k’i konvien-rosh blé si zot i vé. Mé oila, inposib mète ali an ésploitasyon par rapot sate l’arivé.

Momandoné la di Didier Robert i sava laba dann La frans pou oir si néna poin in n’ot manyèr fé la dig donk shanj manyèr san ansèrv lo bann rosh masiv, mé an sèrvan bann rosh néna in pé partou dann karo kann épi dann d’ot karo : i oi bien sa kan i travèrs La Rényon. I apèl sa andin é ala la plansh salu tout in bann i konpran pi zot dovan é zot déyèrla sote dési pou fé avans zot rout an mèr.

So kou isi i parl pi bann rosh masiv, na pi bozoin rosh masiv, z’andin na mète ali. Sof mon réspé, si néna in sèl zafèr k’i rèss masiv, sé la kouyonis lo bann moun i amenn lo shantyé é mi pans nou la pankor oir tout avèk.