Mé z’ami, Didier Robert la vni ankor koz dann télé. Byin sir, la télé la rézèrv ali in bon l’akèy. Mé kozé pou kossa ? Pou donn son program pou l’ané i vyin. Mé kan li té fine fé son kozman, sak la ékouté lété pa pli avansé. Kossa la Réjyon i sava fé dann l’ané 2011 ? Mistèr é boul de gom.

Kèl projé konkré pou 2011 ?
Zot i koné, nou, kréol, bann brassèr d’lèr, sa lé valab aryink kan i fé sho ; Mé brass de l’èr dann lékonomi, dan lo sosyal, dann la défans l’anvironman, dann la kiltir, sa i kontante pa nou ditou. Sak i intérès anou, sé sak lé konkré, konm par ébzanp kèl shantyé i rouv l’ané proshène, konbyin larjan sa i koute, konbyin demoun va gingn travay, konbyin l’antropriz va sov zot kor. Moin la pa antann sa !

Kossa moin la antann ?
La anparl Matignon 2, pou di li éspèr va komans la route litoral par-la l’ané 2013. La anparl bann bus é lo désan-sinkante milyon l’éro i sar mète la-dan. Mé kan ? L’ané proshène ? Bin i fé pa zétide pou sa don ? I mète pa dakor avèk Konsèy zénéral, bann kominoté d’komine, bann komine pou sa don ? I fé sa konm sa pars méssyé Didier i pans li sé in zoli garson. L’ané 2010 i fini, la mèm pa angaz dis pour san la komann piblik. L’ané proshène, ousa nou sar fine arivé ? Pour sir, ni sa kalbite ankor dann longoz la route La Plenn.

La Réjyon, sa in n’afèr séryé.
Shakinn son bit. La komine la syènn ! Konsèy zénéral son syènn ! Kominoté d’komine sète zot ! La Réjyon i doi okipe lo dévlopman lo péi, donne favèr bann projé inportan pou nout l’avnir, pou angaz anou dann shomin lo dévlopman.
Ziska zordi, Didier Robert la pankor konprann sa. Sé konm k’i diré li koné pa kossa i apèl dévlopman.

Justin