Kisa na in fèr dann né ? Dabitid bèf na i fèr dann né. Pou kosa i mète ali in fèr dann né ? Pou bien komann ali, é pou pa donna li l’anvi shanj shomin, sansa gingn la parès pou ral son sharjman kann. Dakor ! Mé ka i di sak moin la mark anlèr-la, la pa pou bèf k’i koz, mé pou d’moun. Dann ékèl ka i di sa pou d’moun, i di sa dann ka in moun i gingn pi komann ali par li mèm. I diré li lé pi mète dé li.

Dann kèl ka i di sa ? In momon i pé dir dopi son garson i koz avèk in fiy li na konm lo fèr dann né : i komann ali, i fé fèr ali dé shoz lé pa posib, i pran son l’arz. Moin lé sir zot i koné dé ka konmsa, sansa zot la koni dé ka konmsa , mé la pa in rézon pou fé parèy. Kroir amoin sé pa kroir in kouyon !