Médam, zé Méssyé, la sosyété, koze avèk mwin sé koze avèk in kouyon, mé sé o pyé d’lo mir k’I oi lo masson. Mézami, dann la sosyété ni viv néna déssèrtin I di ninporte de koué : sa i vé dir i antan souvan dé foi kalité kozman i kass pa kate pate in kanar mé sak i di, i panss li la dékrosh la line vèk lo dan. Si wi pran in kouyon, in kouyon k’i apartien la grand kalitégori dé kouyon-in kouyon patanté - é si wi éssèye détronp ali dann sak li di, ou la pèrde la parti d’avans. Pou koué ? Pars in sèl kouyonade li di, i fo wi dévlope out pansé pou prouv ali son kouyonade lé pa fondé. Mé li atand pa ou, li lé fine sote dsi in dézyèm kouyonade, dsi in troizyèm, é inssi d’suite. Ankor pli mové zafèr wi pé fèr, wi éssèye ranz aou dann larguimantasyon la konfrèri la kouyoniss - l’èrla ou lé fouti pars dann domène-la li lé pli kalifyé ké ou é wi anbèk dann in shominn soufranss pou ou, pa pou li. Li lé alèz la-dan pars sé lo bin li l’apré bingn dodan é dopi lontan. Alé ! Mi kite azot rofléshi la dsi é ni artrouv pli d’van. Sipétadyé.