Oté

I diskite pa avèk in kouyon, i done ali rézon é sa la pa inn bone shoz pou l’intélizans !

Justin / 11 févrié 2019

JPEG - 43.6 ko

Mi pans, konm moin, zot la fine antann bann sobatkoz dann radyo dsi lo l’arivé bann Srilanka. Dann sobatkoz-la i antan in pé tout sort de shoz. Dopi sak i di an gro, ni pé pa anmass tout la mizèr di mond avèk in doz l’égoïsité i fo oir sa... Ziska sak i di La Rényon sé in péi l’imigrasyon é sa sé in n’afèr i fo pa ni gnor.

Zis pou déride in pé désèrtin, mi pé rakont azot zistoir Fernand Raynaud : zistoir-la lé sinp, sé sète in moun étranjé l’ariv dann in vilaz é demoun i rogard ali gro zyé, i ménas ali, i di ali mèm : « Sal étranzé, ti vien manj lo pain bann fransé ! ». Sa la dir in bout lo tan ziska lo boug i pran son shomin i sava mé dopi zour-la, demoun na pi d’pain dann lo vilaz pars lo boug étranzé lété lo boulanzé zistoman…

Bien sir, mi di azot sa, arienk pou farsé mé a bien rogardé, si ou i sava mète in pé out né dann l’éstatistik, ou i rann aou kont in pé partou, souvan défoi bann zétranzé i aport plis rishèss dann lo péi ké zot i détourn pou zot : dabor zot i pèye l’inpo, épizapré zot i travaye souvan dé foi o blak pou anrishi bann patron anpliské sa zot i aport zot konésans lé bien itil pou lo bann zabitan dann lo péi. San konté lésploitasyon zot lé viktime dann lo péi.

Zot va dir amoin dsi in sizé pasyonèl lé dir fé koz la rézon. Lé vré é dann in déba konmsa lé pa rar sé lo bann kouyon k’i kriy é k’i koz pli for si tèlman zot i inprésyone lo moun é mèm lo bann zournalis. Sa la pa inn bone shoz sak mi di la, pars konm moin la fine romark é pa arienk in kou, souvan dé foi sé bann kouyon k’i fé souvan dé foi lo lopinyon.

Pou arpran in kozman pou la rout : I diskite pa avèk in kouyon, i done ali rézon é sa la pa in bone shoz pou l’intélizans.