Mézami mwin la fine propoze azot déza provèrb-la, mé mwin néna anvi propoze azot sa in foi ankor pars li pé soulaze anou in pé é fé konprande anou la konéssans s épi lin télizanss lé pa touzour vinkère.

Pou koué ?

Pa pars la rass kouyon la rogoumante an nonb sé tan issi. Mi panss mèm demoue i koné koméla in bonpé zafère, é do plizanpliss firamézir ké zot néna bande moiyin pou informe azot a zot dispozission.

Mé wala demoune tète dire néna plizanpliss – par l’fète demoune antété. Mi rapèl in foi in doktère té apré diskite avèk in moune konm ou é mwin, é inpossib ali plass in mo désplikassion. La pa ké l’moune lété pli gabyé ké li, é ké lo moune l’avé rézon konte li, mé l’moune l’avé son réponss paré dann son tète, pou toute zafèr é li larg sa inn apré l’ote san soussyé la vérité syantifik.

Si tèlman ké momandoné lo boug – sak i koné – la déklare batu é li la dépoze lé zarm an dizan l’ote : « Ou néna rézon ! ». Mi panss si li téi koné bande kozman kréol li noré même pa komanss in diskission avèk lo moune antété pars té in diskission initile.

Alé ! Mi kite azot rofléshi la dsi é ni artrouv pli d’van. Sipétadyé.

Justin