Médam zé Mésyé, la sosyété, koz èk moin sé koz èk in kouyon mé sé o pyé d’lo mir k’I oi lo masson. Provèrb moin la mark an-o la sa in kozman La Rényon donk moin lé sir in bonpé rant zot I koné ali. Pars lé bien vré ké diskite kisoi avèk in moun I konpran pa arien, kisoi avèk in moun I rofiz konprann in n’afèr, sé in pert tan. Shak foi néna in kriz isi La Rényon-konm partou dsi la tèr !-, demoun kouyon I pran lo pouvoir an parol é kont pa dsi li pou shanj son poinn virzé mèm si in moun I koné I argimant avèk li. La Rézon I pass pa par li, li sé in mir infranshisab. Sé pou sa lo saz rényoné I di anou avèk rézon, pèrd pa nout tan avèk in moun boushé a l’émri-di ali li néna rézon épi arête lo fré. Alé ! Mi kite azot rofléshi la dsi é ni artrouv pli d’van. Sipétadyé.