Sa sé in kozman dir sa ! i vé dir, na dmoun si tèlman boushé na poin arien pou tiré. Lé pa posib fé antann ali in pti myète la rézon. Tout son rézoneman lé fo é la pa ou pou ardrès sa. Donk i di aou, i fo pa pèrd lo tan avèk in kouyon.

Di oui, pars èk oui na poin batay ! Poitan, mi koné na dmoun I fatig azot pou aspliké, aspliké ankor : sa dmoun na konfyans dann z’ot sanblab é si, dann ta, i nyabou ratrap inn-dé grin, dizon sé touzour sa. Pétète fo trap par lo bon bout, pars si i trap par mové bout i défil. In pé i di, la pédagozi i pass par la répétisyon..mi pans sa lé fatigan é si lé nésésèr ?

Kosa zot i anpans : fé travay zot koko, fé bouy zot matyèr griz é pétète rant-rant zot va oir ni péz’ète dakor rantre nou.