Dimansh, na in bonpé d’moun la pa parti voté. Sa lé vré pou vréman. Pou kèl rézon ? Promyé rézon, voté sé in droi, é sa lé pa in l’obligasyon. Donk ou i déside alé voté konm pa alé. Dézyèm rézon, i fo oir kèl lintéré ou i trouv ou nana dann lo votaz. Pars si ou i trouv pa out kont la-dan, akoz ou va fé in nafèr komsa ? Akoz ou va déranz aou pou alé voté kan ou i oi pa bien kossa k’i ansèrv ?

Dabor, i fo pa oubliy, in pé la fé tout sak i fo pou k’lo votaz na poin lo sans. In tan, té i soul la guèl demoun pou an avoir la voi. In tan, té i done in moné pars déssèrtin i kroi in moun sé pa plis ké sa : larzan ! larzan ! Tout i ashète é tout i vann ! Apré la promète demoun travay, la kaz épi tout sort shoz ankor. Kan l’avé p’assé, la domann bann prète modi bann zéléktèr lo mové parti. Arzout èk sa la fé la frode dann zéléksyon. Donk i fo pa trouv drol si in pé dmoun na poin la konfyans dann la politik.

Mazine in kou, moin sé in zéléktèr normal. Mazine i mank amoin travay, la kaz, lo soin pou mon maladi é la monay pou mon manzay. Zéléksyon i ariv. Mi domann, dann mon kèr, si zéléksyon va done amoin in travay, in kaz, épi la monay pou mon manzay. Si moin, mon bann famiy, mon bann dalon la poin rien komsa pou gagné… l’èr-la mi bash le vote, sa lé normal.

Mé si, in zour, mi antrovoi in bon plan, in bon solisyon, moin lé riskab alé. Mi koné i doi an avoir sa kékpar, dann program in parti, mé mi koné pa ousa. Mi oi pa sa dann zournal, sansa dann télé. Lir, touzis si mi koné. L’èr-la, mi bash é mi pans, si toultan lé konmsa, toultan m’a bashé.

Si in zour, mi trouv in parti, sansa in mouvman nana in bon solisyon pou toute sak lé dann maléré sor. Si moin lé sir va aplik program-la ; Si moin lé sèrtin va trouv solisyon pou bann shomèr, bann vyé moun, bann malad, bann travayèr… lé sir moin va partisip le votaz. I doi an avoir in n’afèr komsa !

NB : Mi pans sa lé marké dann program mon parti ; Mi pans, é moin lé sir.

Justin