Oté

I doi z’ète difisil prann in bon désizyon dann in péi ou i koné près pa ditou !

Justin / 23 janvier 2018

JPEG - 43.6 ko

Matant Zélida la ékrir Justin :

Mon shèr nové, mon spès salté, rouj de fon dovan l’étèrnité,m’a dir aou in n ‘afèr : konm mi di toultan, lé pli fasil krétik in n’afèr plito ké trouv in bon solisyon. Sé sak mi di, épi sé sak mi pans, kan mi antann désèrtin moun l’apré krétik mésyé lo préfé épi son l’adminstrasyon pou sak li la fé dann dé pèryod siklone i sort éspasé. Souvan défoi, mi antann désèrtin apré fé konmsi zot nana la syans infiz é si zot lété plasé la plas lo préfé zot nora trouv in méyèr solison. Kroi touzour, mé fyé pa tro. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, moin pèrsonèl mi di pa ou moin noré fé myé si moin té la plas profé. Dabor pars lété pa moin d’fèr in n’afèr konmsa. Sé sak lé dann la résponsabilité k’i doi fé, pa sak na poin okin résponsabilité. Mé néna dé foi mi antan di dé shoz é moin pèrsonèl, mi pans sé dé kouyonad pir zi. In kouyonad mi sort an tann : la pa par Béguitta solman lé shoz l’arivé mé pars avan Béguitta l’avé plizyèr zour gro plui.

L’èrla mi di : pétète sak i di sa na rézon é moin lé sir li néna rézon mé si l’avé in désizyon pou prann téi falé mézir lo danzé, té i falé prann lo problèm dann son totalité. Donk té i falé pa solman agard Beghitta mé agard sak l’avé spasé avan. Lété pa misyon inposib sa ! An touléka sé sak mi pans é mi pans galman Préfé té antouré par son bann sèrvis épi son bann éspésyalis, son bann z’ékspèr .

L’èrla si toulmoun la tronpé, ébin toulmoun lé résponsab. Si préfé tousèl la tronpé, l’èrla sé li k’i doi siport lo bann konsékans. Lé vré kan ou i koné pa lo péi, i doi z’ète difisil pran in bon désizyon. Si an plis ou i pans san konète lo péi, ou i koné pli myé sak i fo fèr ébin l’èrla lé ankor pli danzéré.Tok ! Pran sa pou ou !

NB -Anons in lové l’alèrt vantredi 8h édmi, alé poir kréol lé an mouvman dopi sinkèr d’matin sa la pa in bèl kouyonad sa ? Nora té myé prann out désizyon avan, sanm pou moin.