Médam zé Méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

In plass pou rakokiyé, fitintan demoune nora bien ème aoir in plass konmsa sirtou demoune mizèr, sirtou demoune kaziman anbandoné osinonsa pèrdi dann mové tan, akablé par toute sorte kalité tablatir. Sa lété lo maléré sor bonpé marmaye lontan.. mé zot i kroi koméla ankor sa lé fini ?

Mwin lé pa si sir k’sa pars néna dé shoz lé pa tope ankor dann noute sossyété koméla.

Mé lé vré si wi koné bien débrouye oute kari, in plass pou rakokiyé, kissa i anpèsh aou alonzé sirtou si ou lé malin é si wi koné lo tik-tak.Lo pli fèb i sède mél o pli for i trouv son plass. Kant mèm é sé sa lé domaz mé sa i anpèsh pa zot bien rofléshi é si zot i gingn, démaye zot kari alonnz la zanbe é rèss pa rakokiyé.

Alé ! Ni artrouv pli d’van. Sipétadyé.