Proverb-la, sa in bon léson pou la vi. Dir oui lé fasil, mé dir non, sète-la lé pli difisil. Si tèlman ké na mèm la formasyon pou aprann a dir non. Konm lé pli difisil pou dir non, i ariv ké désèrtin moun i di oui pou tout z’afèr é kan ou la fine amontr out féblès, étone pa ou si in pé i abiz dsi ou. I ariv mèm ké ou i done sak ou la poin, o sinonsa ou i done dé shoz in moun nana pliské ou. Donk i fo konète zozé lo moun i fé kamarad avèk ou, oir si sé in abizèr ou bien non. Pars momandoné ou sar blijé fash avèk out fo z’ami anprofitèr pou arète ali abiz dsi ou. Kosa ou i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan, dakor rantre nou.