Bann jèn, moin lé sir, i rapèl pa tan-la. Bann z’ansien, mi pans, zot i doi an avoir souvnans. Dann tan-la, té i fé la frod dann z’éléksion, si tèlman ké désèrtin moun la fé in l’asosiasion té i apèl l’ADNOE : in l’asosiasion pou déroulman normal bann z’éléksion. I fo dir, dann tan-la, la frod té pa pou zoué. Na mèm désèrtin kandida la pa gingn zot voi sansa lo bann voi dmoun té dsi zot list pou z’éléksionn mèr... Pou mon par, kan moin la vi z’éléksion dan la Frans, moin l’avé l’admirasion pou bann Fransé d’Frans : près pa d’moun dann biro, poinn batay, té i fé la dépouye san fé dézord. Moin té paré pou done banna in brové l’onèté... Bondyé san konfésion.

Mé astèr, mi domann amoin bien si moin l’avé rézon. Pou kosa ? Pars moin la tandi dir, kan bann sosialis la voté pou di kisa sar zot sogrétèr zénéral, i prétan l’avé trikmardaz la-dan. Mi antan i di dann télé, té Ségolène té i doi gingné, é sé Martine Aubry té déklaré vinkèr. Sa lé vré galman pou bann parti k’i di zot lé dan la gosh. Mé sa lé vré galman pou z’éléksion dann parti d’la droit. Dimansh, zot i koné l’avé in z’éléksion pou shoizi lo prézidan l’UMP. Jean-François Copé i di sé li la gingné. François Fillon i di la pa vré pars sé li lo pre. Dann désèrtin biro, l’avé sink-san z’inskri é plis mil votan... Donk, konm bann vyé z’ansien té i di, la-ba osi i gingn fé akoush lo momon koshon.

Astèr, mi pans i fo ni kalkil pli loin. Zot i souvien, dann tan d’avan, lo rol in l’asésèr, sansa sèt in délégué, té pa fasil. Mon papa té i di, té i fo tienbo séktèr pou anpèsh la frod. Koméla, demoun lé pli laksist, zot i pans demoun lé onèt é la pa bézoin bien avèyé vi k’bann frodèr z’éléksion, la ras lé fine étinn. Moin pèrsonèl, mi pans i fo pa tro fé konfians... Nou lé bien sir la pa frodé dan bann dèrnyé z’éléksion ? Nou lé bien sir ? Lé ga, konm di lo kont, i done pa lo shat sosis pou véyé. I done pa non pli lo shat dolé pou gardien.

NB : Donk, i fo ni di l’UMP i fo li fé in spès l’ADNOE pou garanti l’onèté dan son z’éléksion. Sa lé pa initil ! Mé i fo pa non pli, pou l’avnir, ni obli pran nout prékosion.

 Justin