Dan mon ri, nana in bon pé limèb : inn si la gosh, l’ot si la droite, in pé i prétan la fine fé, in pé la pankor fini konm k’i fodré. In pé partou, nana plak blé pèrmi pou konstruir. Dan in pé d’tan, sar konm in mir, shak koté shomin dépi la tèt an-o la-ba, ziska la finision. Kroi pa sa in krak, sa la vérité toulbon, épi moin lé sir zot ossi i koné kalité la ri konmsa.

Alak vandrodi passé, mi romonte lo ri, dan mon vié kok loto. Kossa mi oi ? In bann moun i dsann, la po roz vèy pa koman, épi demoun déza in pé rézonab. Donk bann rotrété i sort la Frans. Shomiz blan, kilote blé marine, moin la konm konpri sa lapa bann moun i gingn dé katsou par moi, mé in bon rotrète avèk lo voul an sifizans... Banna l’apré vizite la kaz, anfi lo bann kaj lapin, kom i fé koméla.

Alor, moin la kalkil sak lo pézidan té apré di, konm de koi nana in pé i vien pass rotrète La Rénion pou défiskalizé, pou gingn lindamnité vi shèr (35 pou san). Mèm si i fo fé sanblan arète si moi issi, si moi dan la Fran, sansa trouv in lokatèr, ou bien loué, la famiy i vien travay La Rénion... Ala koman i pé ankouraz demoun fé in n’afèr soi-dizan ou vé pa zot i fé. I sifi anparl la télé.. Oté ! I donn pa lo shat pou vèy dé lé !

Justin