Médam zé mésyé, la konpagni, koz èk moin sé koz èk in kouyon, mé sé o pyé d’lo mir k’i oi lo bon masson. Kozman moin la mark an-o la moin la antann sa dann diskour in politisien komor : mi rapèl pi kosa li té apré di, mé sa kozman-la mi ansouvien bien. Dann la lang fransé i di : « i zète pa do luil dsu l’fé »-dann la lang kréol La rényon i di :’i atir pa moush avèk vinèg » é mi pans sa sé in kozman pou fé rofléshi d’moun. An touléka, in n’afèr mi koné pars dann mon vi, moin ki yèm lantant avèk la pé, souvan défoi moin la gingn afèr avèk inn bann foutèr d’fé kisoi madam, kisoi mové kamarad, kisoi ankor mové patron mé sak lé sir, kan ou i koné lo prtofil désèrtin, ou i oi tout suit sak i rode dézord avèk sak i vé kalm lo jé. La pa lo mèm zafèr ditou. An atandan, sé azot de oir lokèl lé pli proférab. Donk, mi kite azot rofléshi la dsi é ni artrouv pli d’van. Sipétadyé.