In babane sé karéman in kouyon -mèm in l’éstré d’kouyonis. Mé souvan dé foi pa kouyon par li mèm, kouyon par la fote lé zot. Zot la zamé romarké dann la sosyété néna demoun i pran plézir pou kass ti-boi lé zot, pou fé pran azot po d’shanm pou pla kouvèr, makaroni pou la bouzi. Dé foi mèm désèrtin moun lé san pityé, par raport lé zot. Moin, pèrsonèl , mi èmré i trète demoun an réspé, va èk ménazman, san z’ète méshan, san z’ète kriyèl. Poitan lé pa toultan konmmsa, mèm défoi désèrtin lé méshan, ziska fé soufèr demoun. In kasaz lé kui a outrans, sa i pé fé mal demoun ! Zordi i parl souvan dé foi lo arsèlman moral é mi pé dir azot sa sé in n’afèr i fé mal. Alé ! Mi lèss azot rofléshi la dsi é ni artrouv pli d’van sipétadyé.