Oté

“I fé pa d’fé avèk do boi solman !”

In kozman pou la rout

Justin / 24 out 2019

JPEG - 43.6 ko

Mésyé, médam, la sosyété, kozman moin la mark an-o la, mi pans pa sa in kozman kréol rényoné, mi kroi plito sa in provèrb l’afrik. Mi anparl pars sanm pou moin bann provèrb sa in patrimoine l’imanité é dann in ka konmsa mi pans moin néna lo droi an parlé. Arzout èk sa L’afrik lé pa loin par raport a nou, é an parmi nout bann zansète néna in bonpé té i sort l’afrik é zot san i koul dann vène la plipar bann rényoné. Si ni rovir dsi nout kozman ni konpran bien pou fé d’fé lo boi i sifi pa, i fo osi ti paye avèk ti-boi san konté zétinsèl pou alime lo fé : kisoi zétinsèl l’oraz, kisoi zétinsèl i gingn an frotan in boi kont l’ot, sansa konm demoun i di dopi lontan in tonn sansa in bate-fé. A park’sa, nout kozman i vé di osi, i fo réini plizyèr zafèr pou trap in rézilta, plizyèr kondisyon pou in l’évènman arivé, plizyèr zéléman pou fé in l’ansanm. Alé ! mi kite azot rofléshi la dsi é ni rotrouv pli d’van. Sipétadyé !