Oté

I fé pa zomlète san kass dozèf ! In bon promèss I féré pa d’tor

Justin / 3 out 2020

JPEG - 43.6 ko

Vantredi, moin lété apré ékout in radio dann mon kok loto-in sort radyo I di tout épi lo kontrèr d’tout é souvan défoi néna in l’animatèr réaksyonèr vèye pa-si i ékout ali in pti kar d’èr, i konpran kèl sé son parti pri… Zour-la li téi parl la NRL, sé dir azot, si li l’avé lokazyon amontr pou kisa li bate tambour. Li la gingn lokazyon plis in foi, amontr zorèy lo lou, i dépass dsou la po mouton é li la pa priv ali konm toultan fé son propagand réaksyonèr.

Momandoné, in zoditèr I téléfone ali épi I di ali konmsa afors tir galé, tir galé, momandoné lé riskab mète an danzé la bio-divèrsité. Aprésa lo moun i di danns son kartyé ste anne na pi papiyon, na pi zèrnyé, na pi lézar, na pi zoizo, boudikont na pi tout bann zafèr normalman néna in ta avèk in paké dann la natir. Lo prézantatèr I fé konmsi li konpran bien sak lo ga i di, mé li lans son fraz li la gingn lokazyon répète plizyèr foi dann l’émisyon-la, li la di : « I fé pa zomlète san kass dozèf ».

Mi koné pa kosa zot i pans la dsi, mé sanm pou moin, si néna in bonpé d’moun I pans konmsa, la biodivèrsité lé vréman bien dann danzé. Mé oila, in trouvaye lo prézantatèr : kisa li sava fé kozé d’apré zot, in séspésyalist la késtyon é kisa lété d’apré zot ? Li done la parol Jean Bernard Caroupaye, in lékspèr an parmi bann zékspèr. Ala ké li karèss lo boug dann sans lo poil, ala ké li karèss Didier Robert touzour dann sans lo poil. Ala ké li koz konmsi la rout lété anshové.

An moin-mèm mi di : rout-la sa néna la shyass dan èl sa é si moin lété banna konm kréol i di, moin nora fé in promèss. Pars sanm pou moin, néna arienk in promèss i pé tir la shyass la dsi é ankor, in bon promèss : in kok, sansa in kabri sa i sifi pa.