In zour mwin té apré ékoute in radio dann mon kok loto-in in sorte radyo I di toute épi lo kontrère d’toute é souvan-défoi néna in l’animatèr réaksyonère do préféranss – si wi ékoute ali in pti kar d’èr, l’assé pou konprande kèl parti li apartien… Zour-la téi parl la NRL, sé dir azot, si li l’avé lokazyon amontr pou kissa li bate tanbour. Li la gingn lokazyon pliss in foi, amontr zorèy lo lou, i dépass dsou la po mouton é li la pa priv ali konm toultan fé son propagande pro-kissa a pa bézwin dire.

Momandoné, in zoditèr I téléfone ali épi I di ali konmsa afors tir galé, tir galé, momandoné lé riskab mète an danzé la bio-divèrsité. Aprésa lo moune i di danns son kartyé Ste Anne na pi papiyon, na pi zèrnyé, na pi lézar, na pi zoizo, boudikont na pi toute bande zafèr normalman néna tanpirki pé – in ta avèk in paké dann noute natir rényonèz. Lo lanimatère I fé konmsi li konpran bien sak lo ga i di, mé li lanss son fraz li la gingn lokazyon répète plizyèr foi dann l’émisyon-la, li di :”I fé pa zomlète san kass dozèf. »

Mi koné pa kossa zot i panss la dsi, mé sanm pou moin, si néna in bonpé d’moune I panss konmsa, la biodivèrsité lé vréman bien dann danzé. Mé oila, in trouvaye lo lanimatère : kissa li sava fé kozé d’apré zot, in séspésyalist la késtyon é kissa lété d’apré zot ? Li done la parol Jean Bernard Caroupaye, in lékspèr an parmi bann zékspèr. Ala ké li karèss lo boug dann sanss lo poil, ala ké li karèss Didier Robert touzour dann sans lo poil. Ala ké li koz konmsi la rout lété anshové.

An mwin-mèm mi di : rout-la sa néna la shyass dan èl sa é si mwin lété banna konm kréol i di, mwin nora fé in promèss. Pars sanm pou mwin, néna arienk in promèss i pé tire la shyass la dsi é ankor, in bon promèss : in kok, sansa in kabri sa i sifi pa.

Justin