A ! I fé rir kan rantre nou ni tir défo bann moun étranj. Té i fé rir kan dann tan bann zansien téi di : dsi lo ban déyèr l’avé kat moun èk in shinoi.
I fé rir ankor kan bann demoun i sort déor rantre zot i tir n out défo : i di par ébzanp nout volaye griyé sé volaye la pousyèr, kan i di nou rényoné asisté ni vé lo bèr, larzann lo bèr épi la krémyèr dsi nout zénou. Sa i fé rir azot pou vréman.
I fé rir kan bann blan blan d’fon i gougnard bann moun tout koulèr La Rényon épi i trouv zot plis néna plis vis ké l’izine Beaufon. Mé i fé rir ankor plis kan nou étan bann yab zot i kritik nout lodèr. Fransh vérité i fé rir kan ni di bann morisien sé d’manzèr zako, é kan bann morisien téi di bann blan La Rényon sé in bann blan gri.

Mi doute pa ké leconte de lisle téi ri franshman kan li téi lans bann zin prékasyon rasis dsi Auguste Lacaussade. Mi doute pa par raport tousala.. Mi rapèl in zour dsi bitasyon la tèr in blan, kan son bann zoinalyé noir la mète an grèv li la fou in kou d’pyé dann lo parti inn an parmi-sanm pou li lo ménèr…I prétan par la mèm okazyon i di lété son frèr d’lé .
I fé rir kan in bann spéktatèr i gougnard bann zouèr foutball noir épi i graté azot, épi i pous bann kriyé, konmsi banna té dé sinz. Lé rigolo dé shoz konmsa.

Tousala i fé rir, mé ziskakan ? Ousa sa i amenn anou ? In pé i sasine inn é l’ot dann l’amérik. In pé lé pli mal soigné ké lé zot dann lopital. Inpé i déklansh la guèr sivil, in pé i ril loto, parl pi tout sak i ariv dsi la tèr… Ni pans nout viv ansanm lé konpatib avèk tousala. Ni proklam sa é ni pans nou lé sipèryèr demoun partou késtyon l’antant rant tout demoun. Mé ziska kan ?
In pé va diui, mé zot va di sa lé pa mové sa, lé mèm zantiy sa, i fé sa pou plézanté... Oui ziska k’i éspass dé shoz konm in pé partou dsi la tèr. I komans konmsa, mé défoi sa i tèrmine dann in gran malizé sosyal. Sé la k’lé tro tar, pars nou la pa pran lo bann désizyon k’i fo, kan i fo.