Zot i koné, koméla, nana in tik-tak demoun i fé : zot i arète pa pou souplègn par raport z’ot bann z’anfan. Pou kosa sa ? Pou tout z’afèr, pou sak bann marmay i fé é pou sak zot i fé pa, sak zot la mank fé é sak zot la pa mank fé. Boudikont, tout rézon lé bon pou grongn bann z’anfan. Afors grongné, in zour i ariv a fashé.L’èr-la sé lo bann paran k’i fé pityé é zot i pans marmay na mové kèr é zot i répète pli souvan k’i fo lo kozman moin la di an-o la.

Kosa i lé lo kèr dann in ka konmsa ? Sé lo santiman. Donk ou i fé zanfan mé ou i fé pa z’ot santiman. Zot i fé pa ? Pa vré sa, pars pou moin zot lé konm k’i di in pé résponsab osi. Kosa zot i anpans zot ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, dakor, rantre nou.