Mi souvien bien kosa in moun-déza gramoun !-téi di. Li té i di : « Mi vé manz in pti pé, mé dé bone shoz ! ». Kosa sa i vé dir ? Sirman sa i vé dir si manzé lé bon, moin lé dakor. Dann provèrb ni oi zordi, sé près la mèm shoz : lé sir ké si ou i done lo shien in boul mayi, moin lé pa sir li sava sote dési pou li manz sa konm in goulipia… Mi domann amoin si kozman-la nana in sans pli zénéral… é mi pans ké oui.

Sa i vé dir si i domann amoin pou fé in kékshoz i flate mé sans, sir-é-sèrtin mi fér ar pa lo difisil ; si lo kékshoz i plé pa moin ? Moin lé z’aboné absan... Astèr alon kalkil in kou : si lo z’afèr lé itil, mé si i plé pa moin-konm in médikaman !- moin lé sir m’a fé in n’éfor pou vi ankor dé zour an plis... Aprann loson, fé dovoir mèm si i fo kass la tèt ? Na d’marmaye lé partan é mi pé dir zot i ménaz pa z’ot fors. Zot i oi mon provèrb la pa vré toultan é sa lé dann son rol-absoliman !