Médam zé Mésyé la sosyété, koméla na pi mèr poul konm l’avé lontan. Dann tan zot té i ézite pa fé in voltaz dsi d’moun, sansa dsi zanimo, pou protèz zot pti. Mi souvien in kamarad téi éspli toultan koman in mèr poul, la plime gonflé, la raz dann kèr, l’avé kapote ali kan li lété pti avèk dé kou d’pyé dann léstoma… Rozman son momon la faroush lo poul avèk in bransh doboi. Tousa pou dir si ou i vé trap son pti, i fo ou i lèv bonèr, sansa ou i détourn latansyon lo momon, mé amadoué sa moin lé pa sir. A moins ké ou néna in fluid éspésyal. Antouléka, kozman-la i vé dir, in poul lé paré pou fé toutzafèr pou protèz son pti. Konm tout fémèl zanimo mi pans, é mi koné pa si la fémèl léspès imène lé toultan konmsa pars i fo dir, nou léspès imène nou la fine pèrd in pé nout roflèks natirèl. Alé ! Mi kite azot rofléshi la dsi é ni artrouv pli d’van. Sipétadyé.