Si ni rogarde la COI, ni konstate La franss la kaziman pran noute plass é nou lé bien an pène pou fèr avanss noute zidé épi défande noute zintéré dann la rolassion rante La Répiblik Maurice, Madagaskar, Sésèl, Komor épi La franss. Oussa i lé l’inivèrssité l’osséan indien ? Nil par, dizon i égziss pi. Si ni rode bande zakor kopérassion rante nou é lé zot manb la COI, lé drol mé napi é si zamé i nonm in rényoné konm sokrétèr zénéral la COI, sé pou anpèsh ali fé kétshoz pou La Rényon. Antouléka si li la fé mi oi pa koué !

Sak la lir l’interview Elie Hoareau par Salim Lamrani i konstate non sèlman La franss épi L’érope i défande pa nout zintéré dann noute réjion, pire ké sa li sakrifyé noute zintéré. Elie i ésplike in zour dsi la késtyon bande APE, dann tan li lété dépité éropéin, li la parti oir in moune la commission éropéène pou li dir koman noute lékonomi téi pé z’ète dann danzé avèk bande famé APE. La pèrssone la di ali karéman La franss lé o kouran toute bande négossyassion é zamé èl na poin arien pou dir. Li téi vé dir soinploman : alé domande dé konte oute gouvèrnman si wi vé !

Mézami, sèryèzman, ni pé pa kontinyé konmsa. Si ni vé in dévlopman otosantré dann losséan indien ni pé pa kontinyé tourn lo do avèk sak ni apèl noute bande péi é pèp frèr…I fo in raproshman rantre nou é zot dann zot intéré épi dann noute intéré anou. Tanka La franss mi panssè li doi arète in pé avèk son sistèm dominassion dsi nou.

A bon antandèr salu !

Justin