Bann siper-vaza le G8 la réini la-ba, dann l’Almagn pou diskit rant Grand’zans desï bann problèm néna sï la tèr. Zot la koz sï la polision par bann gaz "à effet de serre". Zédi soir la anons zot la trouv in akor rantre-zot : zot i vé diviz par dë lo kantité gaz karbonik difizé shak ané d’isi 2050. Konmsa la tanpératir va goumant dë dégré par-la, dann vintéinyèm syèk.

In nafèr lé ankourazan : nou pé dir, na moiyen pa fé goumant la tanpératir si bann gran péi i vé : akoz diminié moitié solman, akoz pa troi-kar ? Akoz atann karant an, akoz pa fé pli vit ?
Koman i fo fé ? I fo bann gran résponsab i pèy pou sa. Vik zot bondyé sé larzan, sé par la k’i fo trap azot. Akoz pa in taks intèrnasional pou kal in pé bann gro polyèr épi pou èd bann péi pov pou prépar z’ot lavnir.

Akoz lé pli gran risk sé pou bann péi pov épi souvan dé foi, la pa z’ot lotèr si in nafèr konmsa lé riskab arivé. Asé demann la sharité kan i ariv bann péi pov in nafèr, i vo myé èd banna par avans. Sirtou, i koné tout traka i sar ariv azot.
Sé bann gran polyèr ki doi pèy pou sa.

Justin