Médam zé mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo mason. Mézami, si mi tronp pa kozman-la sé in kozman dsi la solidarité. I di pa dann bann provèrb kréol rényoné : « In min i lav l’ot ! ». Sa sé galman i kozman dsi la solidarité sa ! Fransh vérité avèk in sèl zong i tyé pa in pou-avèk in min i gingn pa lav son dé min. Inposib ! Mèm si i di « inposib la pa kréol rényoné ! ». Mé sèye fé zot va oir, zot i gingn ar pa. Donk ni pé di : mèm si sé in n’afèr sinp pou fèr, i ariv i fo ou lé a plizyèr amoins ké ou i invite tout sort kalité tik-tak pou ariv o bi. Parl pi kan lé konpliké, kan i fo lo konkour plizyèr pèrsone pou ariv o bit. In légzanp : in mason. Si na poin in manèv li ariv ar pa travaye konm k’i fo. Alé ! mi kite azot rofléshi la dsi é ni artrouv pli d’van. Sipétadyé.