Dann liv listoir, nou la aprann bann barbar la atak bann péi loksidan. Mi ansouvien, mé sa nana pli lontan k’lontan, zot lavé drol nom : téi apèl banna Ostrogoth, Visigoth, Burgondes, lavé in pé téi apèl bann Hun. Téi di konmsa oussa zot i pass zèrb i arpous pa. Té bann vré barbar, pou vréman. Spandan, z’ot barbari té pa ossi danzéré ké sète bann sivilizé koméla : banna i rod tié la natir ziska zot va niabou tir lo dèrnié grin pétrol nana andan. Mi sort oir in roportaz déssi lo kanada, in vré rashkèr !

La-ba, bann gran sosiété kapitalis i tir pétrol dann sab, kissoi dann fon mèm la tèr, kissoi in pé anlèr-anlèr. Kan zot la fini tir tanpir k’i pé, la tèr lé anpoizoné pou lontan mèm. La plui i tonm, lo poizon i sava dann lo bann sours. Bann zindien i boir d’lo, épi zot i mor avèk tout sort kalité kansèr.

Armète la dsi tousa gaz léfé d’sèr i arzète dann l’èr ziskatan limanité va krèv avèk la shalèr, poisson va kui tousèl dan la mèr, plantasion va sèk, épi dmoun va manz galète la bou konm la-ba dann péi i apèl Haïti.

Alor, kèl nom i fo donn azot si la pa lo nom “barbar” ?

Justin