Zéléksion i ariv. In rar lokazion pou tout dëmoun pou poz azot tout késtion zot la oubli pozé dann passé. Nou pë dir konmsa : akoz lé shoz i éspass pa konm mi voudré ?
Akoz, bann kandida, la plïpar, i rëssanm i di ankor in bann zafèr, zot mem, sansa lé z’ot téi di déja lané 2002 ? Akoz, moin nana konm lidé, z’ot projé té konm ki diré, inadapté ou bien zot la pa pran an kompt in sitïassion kla shanj in bonpë plï vit zot téi kroi. Dizon, zot noré in guèr an rëtar shak foi.
Nana in ot kalité problem, sèt le bann zinstitission : ou diré la frans sé in vré "lizine-a-gaz", anmanshé avèk lërop. Kissa i fé tèl shoz ? La pa lï, sé l’ot ! Alor l’moun i konpran pï kissa i fé kossa.

Donkalor, bann ti-kolon, sak lé pa kalifié lé riskab dir zot i konpran pa. Tank’a bann moun kalifié, zot ossi, pétèt zot i koné pa, zot i fé sanblan. Zot i rod fé kroir anou, in diskour i vo in solission. Alé oir ! zot i koné : la lang la poin lë zo ?
Koman ou konè si së lang-la lé apré manti,s ansa lé apré di la vérité ? La kanpagn, i vienn komansé, sé a nou d’fé nout lopinion. Konm diré mon bann kamarad yab : i fo shanzé, solman pa ninpor ékèl shanzman. In shanzman lé bon pou nou, bann ti-kolon.

Justin