Leconte de Lisle ? Le pti marmay i friz le fron, i kalkil mèm, apré li di : « Néna in farmasi i apèl konmsa an ba la-ba ! »...
Eugène Dayot ? Le létudian i friz le fron épi li di : « Saint-Paul la-ba, néna in ri ! », Lacaussade ? Sa le nom, koméla, la ri la gare Saint-André... Listoir La Rénion, sa lé prévi dann program lékol primèr. Oui, mé na poin le tan pou fé sa, épi le mètr, déssèrtin foi, i koné pa tro-tro...

Moin la touzour tandi k’pou bien konprann sak lé loin, i fo bien konète sak lé pré. I di pa k’pou bien aprann sak ou i koné pa, i fo ou i komans par sak ou i koné pou alé pli loin. Mi pans sa in bon tik-tak pou tienbo la konéssans, pou anpèsh ali shapé pli vite ké li l’arivé - sa sé lo bann ti-kroshé pou bien souk ali ! Sansa, lé riskab ossi i intérèss pa in bon pé marmay, épi z’ot famiy - lékol pou bann marmay, i pé pa ète in pé lékol pou la famiy ?

Alor, pou mon par, mi pans i fo bien fé konète nout kiltir, nout lanvironman, nout manièr oir la vi. Moin la di, épi mi pans lé vré : i fo La Rénion épi loséan indien sé in matièr pou amontré dann tout klass, mèm pou sak i sava lékol pou bann gran. I fo mète sa dann program, fransh vérité !

Justin