I fo mi di azot avan sa la pass an fèyton dann in zoinal lété bien gayar dan l’tan é té i apèl « Temoignages chrétien de La Réunion ». Pou sak i koné pa, ébin bann biyé konm zot i pé lir dann déssèrtin zoinal sa lé pa ékri d’avanss sa i vien niméro apré niméro firamézir lékrivèr néna son linspirassion.

Défoi mèm sé in moune i komanss épi d’ote i pran la suite. Sé konmsa ké mwin la aprann bann promyé biyé zistoir Tikok la komanss avèk in gran bononm la kiltir rényonèz i apèl Daniel Waro épi Christian Fontaine la pran la suite. « Témoignages Chrétien » téi parète inn foi par somenn donk in foi par somenn Christian Fontaine téi doi trouv kékshoz pou ékrir.

La plipar d’tan sa lé gayar pou vréman mé sa i vé pa dir li la pa kass son koko pou fèr sa. Mwin k’i ékri dopi lontan mi koné la soufranss l’ékritir é mi mazine galman sète Christian Fontaine… Zordi son bann kozman la parète an liv : inn foi sé lo CDPS Saint-Louis la pran lo soin pou sa. Dèrnyèrman sé lofis-épi ti koutiye la pran lo rolé pou anpèsh bann kréassion-la tonm dan l’oubli.

Pou kossa mi di sa ? Pars zot i koné Christian Fontaine lé mor dann in lakssidan é li lé loin d’avoir done tout son kapab dsi la kiltir rényonèz mé son déstiné la shoizi pou momandoné koup lo fil sa vi é la fé pass ali l’ote koté… li la lèss po lo léktèr kréol rényoné in kantité pti zistoir é mi éspèr bann zénérassion a vnir i lèss ar pa sa dan l’oubli pars pou sak la lir, zot i koné bien christian fontaine in sakré bon kou d’plime li l’avé so boug-la.

A bon antandèr salu !

Justin