Mèrkrodi soir, moin la parti in manifèstasion bann z’aktèr kiltirel. L’avé in pé d’moun : dann télé la di l’avé in santène personé. Mi pans té i sifi kont lo nonm lo pyé épi diviz par dé… Toutfason l’avé poin dmoun par milyé, sansa noré fé in révolisyon oir sa isi La Rényon. Pou komansé l’avé plizyèr pano avèk lo nom bann téat, sansa bann sal. Aprésa, l’avé l’nom désèrtin métyé kiltirèl. Aprésa ankor l’avé inn-dé kozman konm "la kiltir, sé in droi", osinonsa la kiltir pou vanj kont lo shomaj.

Pou kosa banna té apré manifèsté ? Pars, solon zot, gouvèrnman i vé raz a sèk dann bidjé la kiltir. Mi pans lé vré, pars kan i vé résèr in bidzé i komans par rabote bidjé la kiltir, aprésa i rabote lo sosyal. Gouvèrnman i vé diminyé lo bidjé an zénéral é li rode partou sinkant milyar pou lé troi z’ané k’i vien. Lé vré li di i fo fèr myé avèk moins, mé Sarkozy té i di sa dann son tan é in pé la santi la doulèr kisoi an goumantasion l’inpo, kisoi an diminisyon bann sibvansion. Astèr i domann bann koléktivité lokal raz la pint pli vit posib.
Kosa i pé arivé ? In pé bann projé kiltirèl va kapoté sirman. Aprésa, nora in pé plis shomèr an parmi bann travayèr la kiltir, in pé moins shif d’afèr dann la kiltir, donk va nyabou goumant ankor la kriz... Mé d’apré zot, la kiltir sa in n’afèr i èd lékonomi épi iède l’anploi sa ? A tou lé kou ; la prèv, kan lo mizé Beaubourg la désantraliz dan l’est La Frans, la goumant laktivité dann l’androi. Mi koné pa bien sak i apèl lo bann rotonbé la MCUR, mé moin lé sir nora donn in bon rézilta, dsi larzan améné dann l’androi, épi dsi lo bann pèrsone apré travay dann mizé-la... Arzout ankor tram-train té i doi pass par la…

Pou finir, pou moin bann demoun la manifès mèrkrodi soir l’avé rézon. Biensir i fo ou i kriy kan ou i gingn ankor ! Biensir lo rogré, i vien apré la mor.

 Justin 

NB Pou monpar moin la poz amoin dé késtyon : inn, akoz in bonpé d’moun i koz fransé an parmi banna ? Akoz in bonpé i koz pa kréol ? In n’ot zafèr, moin té a dmandé, an moin mèm, si in bonpé moun la, té pou la mcur. Touléka kan la fini avèk la mcur, moin la pa tandi tro d’moun fé antann zot kolèr.