Mardi somenn isi, moin la parti l’inivèrsité pou ékout in sobatkoz dsi sak Paul Vergès la propoz dann son dèrnyé tan pou réform bann z’institisyon La Rényon pou donn bann rényoné plis résponsabilité dann la diréksyon bann z’afèr nout péi. Mi sava pa ardi dann mon kat ti mo sak li la di dann plis ine èr d’tan in kar mé sak lé sir sé ké son bann kozman i amontr anou l’éritaz Paul Vergès sé in n’afèr inportan é i mérite ni étidyé sa a-fon. [1]

Apré lo konférans profésèr Oraison plizyèr pèrsone la poz z’ot késtyon épi la di sak zot l’avé pou dir. An parmi in jène profésèr bien fringan é d’apré sak li la di li prann par bann z’atlyé z’asiz l’outremèr . Biensir é moin la bien santi ali, li té i vé amontr lo travaye Paul Vergès lété pa si inportan ké sa, pa si d’aktyalité ké sa, épi lété pa in n’afèr pou shanj lé shoz isi shé nou épi pou myé dévlop nout péi. Si li lir mon kozman, sak mi kroi pa, mi pans li va di moin la rédui son poinnizé é mèm moin la pétète tronp amoin dann lo sans téi falé donn son l’intervansyon. An touléka sé sak moin la konpri dann sak li la di.

Aprésa, vi ké lé toultan konmsa, li l’atak bann politik La Rényon pou dir si banna téi fé travaye in pé plis z’ot matyèr griz pétète lo péi nora té fine avans in pé plis. Maurice Gironcel té la é li la rapèl kant mèm, si néna in parti la pa fé arien pou nouri lo réfklèksyon lo bann z’asiz la pa nout parti kominis rényoné vi ké li la dépoz son bann dosyé, li la fé son bann propozisyon, ép li la lans rapèl pou in déba dsi son bann z’idé, son program, épi son bann projé pou La Rényon pou kontinyé lo travaye épi lo bann réfléksyon Paul Vergès la fé dann son vi.

Biensir sa i éskiz pa la parès désèrtin politik é pétète zot mank kapasité pou mète an mouvman z’ot matyèr griz. An touléka sa i vé bien dir i fo pa mète tout rényoné, épi tout bann politik rényoné dann mèm panyé.