Pandan lontan, nou la réspir rienk par La Franss. Nou té konm ti-shien, lo zié la pankor rouvèr, i rakokiy dann lodèr d’lé, tété zot momon.
Si in pé rant nou téi di : "Alon grandi in pë ! Alon rouv lë zié ! Arète marsh gro-kat pat, marsh in pë debout !". "Tansion, pangar", in pë i di. "Tansion bann zènnmi La Franss" :

Astèr, la loi i tap dëssü, la répréssion i marsh a fon. Sank ou konpran, ou lé konm proskri dann out péi. I kri aou "Séparatis !". Sa solman lavé assé pou tak baro, partou , dovan ou : zanfan té i guingn pa la bours, i rash out kro dann travay, i mèt aou prossé-vèrbal akoz out rou lé liss. Konm té i di in prézidan la répüblik, ou lé pï in advèrsèr, ou sé in zènnmi.

Lo tan la passé. Léspri fénoir la dissip in pë. La Rénion la komanss zoué in rol dann nout réjion. Estèr i komanss di, i fo nou travay avèk Madagascar, Maurice, l’Afrik dü sud, la Chine, l’Inn épï d’ot péi ankor.

Ala mèm i di, i fo in konsïla la Shine, La Rénion. Nou apèrsoi, i fo pa nou la pèr grandi.

Justin