Astèr in razèr d’pinte kossa i lé ? Sé in moune i mète lo moinss possib dann in pinte é l-éta i pé z’ète in razèr d’pinte sirtou kan li fé tout pou diminyé bidzé lé zot : kissoi lo départman, kissoi la komine, kissoi la réjyon, kissoi la lbu é biensir si léta i raz la pint aprésa sak la pinte lé razé néna moinss possibilité pou fé in bidzé sifizan.

Nou la antann léta i sava raz la pint bann kontra PEC si tèlman bann mèr épi lé zot la pèr pa gingn fèr sak zot i fé dabitide. Lé sir kan ou néna dis mil kontra PEC lé pa parèye ké si i rèst aou kat mil mèm soupéyè sa i fé mwin d’moune pou travaye.

Pou ma par, mi panss i fo anfini avèk bann kontra PEC pars sé inn violassion lo prinssip d’égalité, épi pars sa i fé bann travayèr pov, souvan i fé lo mèm travay ké sak i toush pliss ké lé zot, souvan galman sé in bann famiye lé manipilé par rapor bann travayèr i rossoi in méyèr pèye é anpliss néna la sékirité d’lanploi bann PEC la pwin.

Alor manifésté lé bien ! dir léta sé in razèr d’pint lé bien ossi ! mé aksèpt sak é an pec i gingn in pti salèr, lé kondané a ète bann tyravayèr pov, donk aksèp sa lé pa bien ditou… Lo mèr tampon la di li défann lo bann sèrviss piblik mé li défann pa bann pec. Ok ! bin alor kèl solission lé ziss épi ékitab. Kèl solission pou défann bann sèrviss piblik é pou siprime la povrété.

Mi yèmré bien avoir in réponss… pa in porte ouvèr pou tonm dakor avèk léta lokal pli dvan..

A bon antandèr salu !

Justin