I fo pans bann viktime an promyé

Vantredi soir, zot I koné l’a spass in bann z’atanta dann Pari avèk in kantité viktime. mèm plizyèr santène. Lo l’éta islamik la rovandik lo bann z’atanta, konm zot l’avé réklam sé zot lé résponsab sak la éspassé dann lo bann z’atanta Bombay, Bayrouth épi d’ot ankor. Biensir pou nout par ni romark myé épi nou lé pli trakasé par sak I éspas dann nout péi, mé ni obli pa lé z’ot kant mèm. In pé i apèl sa in bann z’akt la guèr mé zot i réspèk mèm pa lo bann loi d’la guèr. I pé apèl sa in bann krime kont l’imanité é sa i anmank pa zordi.

Krime kont l’imanité sa lé plizanpli pratiké koméla. Lé mèm pratiké par bann péi é an parmi bann péi sak lé pli rish, é na plis bann z’arm avansé dsi la késtyon téknik. La pa bézoin mi di lo nom pars toultan i di sa dann l’aktyalité. Kan li lé pa pratiké par bann péi, li lé fé par in bann z’organizasyon i apèl sa bann z’organizasyon téroris. Sa i mank pa dann l’androi nana la guèr é mèm in pé lé pli rish, pli armé, ké désèrtin péi.

Donk, dann Pari vantredi soir la spas in bonpé z’atanta téroris é lo bann z’atanta té fé pou fé lo maksimom lo mor épi blésé é zot la fé pou vréman. Kèl kalité d’moun té tyé épi blésé ? Lo bann moun la pa fé arien la-dan. I pé dir zot lé inosan dann sète afèr-la : zot lé ni dann in kan, ni dann l’ot, zot lé pa résponsab sak bann kriminèl la fé – mé lo bann z’atanta a l’avèg i shoizi pa la tèt. Donk sé bann viktime k’i fo pans an promyé. Lo péi la désid fé in dèy troi zour… Pou moin, sé pou lo bann viktime é z’ot l’antouraz, pou zot solman é pou bann popilasyonn sivil bien ménasé dann z’ot vi o-zour lo zour.