Mi koné pa si zot i souvien bann pil lo pon dsi lo bann gran ravine La Rénion. Kisoi pou fé sirkil lo trin, kisoi pou fé sirkil kamion, loto. Sak té i étone amoin shak foi moin té i rogard bann pil la lété k’moin té i domann amoin par kèl mirak lo bann pil i tien ankor d’bout rant bann gro galé, èk in fors kouran pa ordinèr ditou. Sirtou kan lo ravine i koul bor-an-bor, donk kan nana mové tan, pars kan la pli i tonm pa, bann ravine, konm di lo kont, i koul a sèk.

Donk, shak foi moin té i oi bann pil do pon-la, moin té i koz avèk domoun pou trouv in l’ésplikasion. In zour, in madam Sin-Pièr, i apèl madam Dupont, la ésplik èk domoun dovan moin, si lo pil i tienbo d’bout apré in kantité d’tan, sé pars na in bon fondasion, ziska nivo d’la mèr, é défoi mèm in pé plis ; donk lo kouran, olèrk krézé, li ranblèy èk galé épi la sab. Moin la trouv l’ésplikasion-la té sinp, é pou moin, sa té in vré l’ésplikasion, sirman aproshann la vérité.

Pou kosa mi parl de sa ? Pars mi sort rogard in foto dann zournal i amontr in dig dsi la plaz Rosh-noir, pété an plizièr bout, dizon konm in kolos lo pié an arzil... Dan mon kèr, moin la pans, kan bann zénérasion lontan i fé in l’éspérians, bann zénérasion koméla na bien tor pou fé konm si té in n’afèr té i égzis pa. Mésié Dupont lété injénièr avan la guèr trant-nèf karann-sink, é mi pans pa li nora fé in travay an koshon konm sa... konm la dig la plaz Rosh-noir.

Moin la pans galman, nout an-nuiman par la fot lo réshofmann klima lé dovan nou, é nou na mèm intéré pran bien prékosion kan i vé fé dsi l’bordaz la mèr, é sirtou pa fé ninport kosa, ninport koman.

Justin