Mézami néna plizyèr fasson fèr in n’afèr : wi pé fèr ali trankilman, wi pé fèr ali an vitèss, wi pé fèr ali dousman lo matin pa tro vite l’aprémidi. Mé si wi fé avèk lo nèr, mi pé assir aou sa la pa bon. Atann aou a kass toute zafèr dann oute min... Fèr avèk lo nèr sé kan ou lé dsi lé nèr pou fé in n’afèr. Ou lé dsi lé nèr, sa i vé dir wi kalkil pa, wi mète la préssion dsi toute a komanssé dsi ou mèm.

Mi rapèl in zour mwin l’avé ropran sak mwin l’avé lir dsi in pankarte in grévist. Sak lo boug l’avé mark lété in sinp fraz é fraz — la lété : « Patron, assé mète la préssyon, lèss sa pou la rou ». Sépa si zot i kotoiye in moune i mète la préssyon mé mi pé dir azot sa la pa in bonbon koko. Pou koué ? Pars a l’èr-la minite, ou lé bon pou ésplozé é pou fé ésploz lé z’ot...

Néna in léprèssyon mi yèm sé : « La vitèss néna son tan ! »… Wi pé fé vite mé néna son limite. Zot i pans spa konm mwin ?

Alé ! Mi kite azot rofléshi in pé dsi sète afèr-la é ni rotrouv pli d’van, sipétadyé.

Justin