Pou finir, lé shoz i vien pli klèr. Huguette Bello la fé son mouvman é tout in ramasi d’moun kont nout parti la vni... Alamélou té bra dsi bra d’sou avèk in sèrtin Franco. Bann trotkis lété koté bann z’oportinis. Tout sak té programé pou vot kont Paul Vergès épi Gélita Hoarau té la. Zot i di pi zot lé kominis zordi, zot la fine vir zot palto dovan-déyèr. Samdi, Mésyé Lagourgue, mèr Sint-Mari, kandida dépité, la fé in konférans do press. Bien antandi, zournal la mèt foto bann partisipan. L’èr-la, kisa i oi dsi foto ? Madam Pausé, mèr ranplasan sak la prézant kont Gironcel, épi inn-dé moun té akonpagn aèl, koté in moun l’UMP konplis Didier Robert, promyé résponsab la kriz isi La Rényon, lo boug la désid kas lo tram-trin épi bann gran prozé Paul Vergès l’avé mont pou dévlop nout péi.

Si mi tronp pa, l’ané 2010, so bann moun-la la fane bann trak pou lo program l’Alyans, pou lo program lo PCR. Si mi tronp pa, so bann moun sa lété dann kongré Parti kominis Sin-Lui. Kan la fé z’éléksyon sénatèr, banna la fé l’ipokrite koté Paul Vergès : zot lété ziska près an kolèr kan in pé la di nana in bann moun soidizan kominis la vot pou bann kandida la droite... poitan, la mank nout bann kamarad plis san voi gran z’éléktèr soidizan kominis, soidizan alyansé, soidizan progrésis. Zordi, pou in sinp rézon éléktoral, pou in késtyonn manda lo mèr, ou sinonsa dépité, ala ké tout zot bann z’idé i fane, ala k’zot i asosyé avèk bann z’advèrsèr nout dévlopman. Ala ké pou zot, in l’opinyon, in konviksyon, in l’idé, in gran prinsip, in program, mèm l’avnir nout pèp rényoné i vo pa plis pou zot k’in shifonn papyé.

Kèl ont ! kèl kou d’pyé bourik ! kèl zirman kont in parti i amèn la rézistans nout pèp, la lite pou not l’idantité, la fé la révolisyon dan la tèt nout bann konpatriyot, la vanj pou anpèsh in jénosid kiltirèl kont La Rényon... Elie, konbien Figaro l’avé dann nout l’antouraz ? Konbien tra-izon nout parti la siporté é dopi konbienn z’ané ? Dan kèl éta lo parti nout bann martir lété randu ? Elie, ou na bien rézon kan ou i di in rofondasyon nout parti lé bien nésésèr. Mé soman, konm i di dan l’intèrnasyonal, i fo shanj de baz ! I fo ni artrouv nout vré valèr !

 Justin