Oté

I fo vanj kont la mizèr ! I pé vanj kont la mizèr ! In konba nésésèr, pa in konba initil !

Justin / 4 désanm 2019

JPEG - 43.6 ko

Mi sort lir dann Témoignages mé moin lété fine lir avan dann d’ot zournal, dann d’ot sours z’informasyon bann gran komine La Rényon lé mal plasé dsi lo poinn vizé zot rishès par pèrsone. Dann bann grann vil la : dann bann gran komine-la néna plizyèr an parm sé i bann komine pli pov dann l’ansanm La frans. Parmi bann gran komine-la néna Sin-Pyèr, néna Tampon, Sin-Pol épi Sin - Dni épi d’ot ankor. I fé bokou pou l’outremèr ! fé bokou pou La Rényon !

Bann moun pli malin ké lé zot va dir é i di déza sa la pa vré - sinploman néna plis bann fyonèr isi La Rényon par rapor lé zot landroi. Sèryé lé ga, La Rényon néna fyonèr dakor, mé dann lé zot péi l’outremer la poin, dann La frans la poin. Alé dormi don ! Aprésa si ou i rogard bien néna fyonèr an parmi bann pov, mé néna fyonèr galman an parmi bann rish. Sak i tronp dsi son dékarasyon zinpo, sa la pa fyonèr sa ? Sak i kalkil mal son rovni dann son lintéré, sa la pa bann fyonèr sa ? Alor siouplé, arète in kou malparl bann pov pars mal parlé, i pé sfèr sa i kontant désèrtin, mé sa i vé pa dir ditou d’ot i di sinploman la vérité.

Astèr, l’androi nou la fine arivé é pou tienbo kont La frans sé in péi rish i ézite pa tou bout shan anons son bone zintansyon, son bann prinsip : la liberté, l’égalité épi la fratèrnité, sanm pou moin i fo arète koz in kou, i fo fé astèr é la pa kont zot zintéré. Mé konm i di sharité bien ordoné i komans par soi.

Dann kékmoi i sava fé zéléksyon minisipal. Lé bien é vi k’i rovien mi domann amoin si i fodré pa, so foi isi rogard in kou bann pov, fé in sèryé zéfor pou tir azot dan la mizèr... I gingn trouv milyar par dsi milyar pou fé la route avèk in gapiyaz inkroiyab épi avèk lo risk lo pon di nor i tonm dann lo, i gingn pa pans in pé l’moun. Sré pa l’èr fé disparète in pé la mizèr ?

Mi pans lé pliské l’èr, é mi kroi lé posib, é mi kroi lé itil. Alor alon fé ! Akoz pa ? Si la bèrn anou dopi lontan mi pans lé l’èr pou mète anou in pé an limyèr. Lé l’èr pou tienbo kont nout bézoin astèr...