Oté

I fo viz la kalité, i fo viz la nouvoté

Justin / 19 avril 2021

JPEG - 43.6 ko

Mézami, dann la zourné yèr, mwin la antand in bonpé zoinal parlé shak foi téi anparl lo doub kriz dann lo vin fransé/ promyé kri par l’fète lof roi la totoshé épi la bril band bojon, épi lo dézyèm kriz par lo fète band vitikiltère i vand bon marshé lo vin an vrak pars néna in nouvo rékolt i sava ariné é i fo dégaj lo band kav donk i fo vande bon marshé édann in ka konmsa la plantèr li anpèrde larzan plito ké li gagn.

Mé la pa toussa, mwin la antand dir lo pri ba la pa pou band vin gran kalité pars sète-la lo pri i bèss pa, mé band vinnormal, ordinèr, bon pou bloire mé san pliss, zot pri i bèss. Pou kossa mi anparl sa ? Par raporte La Rényon bien antandi. Mi vé pa anparl dovin mé d’ote produi. Mon késtyon sé : i fo produi band zafèr ordinèr sansa band produi la kalité.

Si ni fé lo thé ordinèr, mi pé dirla konkiranss sar tro for é ni gingn ar pa vand. Parèye pou la vaniye ordinèr, pou lo kafé. Ni pé dir ossi i pé z’ète parèye pou band produi san téknolozi élaboré, épi pou band produi la pa bézoin in bone doz limazinasyon pou fé azot. Donk si ni baz dsi sak toulmoun i pé fère é méyèr marshé ké nou, nou sar batu, é si ni baze dsi la kalité nou néna dé shanss gingn la parti.

Alor mézami, dann in péi la min d’èv lé shèr, lo bann zintran shèr galman, i fo viz la kalité, épi la nouvoté, baze dsi noute matyère griz - é néna arienk konmsa nou va ansorte anou konm k’i fo.