n zour in moune la di amwin li yèm bien son zanimo. Li yèm bien kan li néna bon apéti é ké li manifèst son kontantman kan li pran son ropa… Mi koné pa kossa zot i anpanss, si zot lé jéné, sansa non, kan zot i oi in koshon manz son manzé bonapéti. Mi avoué mi poz amwin késtyon dsi toussala.

Mi poz amwin késtyon galman kan mi étidyé listoir la kolonizassion. Biensir la ni shanj réyon ! biensir ni anparl listoir limanité é vi landroi ni lé, sirésèrtin nou lé oblizé poz anou késtyon.

Par égzanp, ni pé dir ni konpran pa kan bann dirijan l’afrik i ral lo kont pou an avoir in romiz dsi in dète zot la fé avèk bann blan. Mé dann in ka konmsa ni artrouv anou dann ka nout porovèrb kréol i di. Nou lé dann ka lésploitassion kolonyal sansa néo é pétète ni di konm in pé i di, la romiz la dète sé kant mèm otan d’larzan bann franssé nora an mwin.

L’èr-la non solman ni domann koshon romèrssyé anou pou lo sal nou la done ali, mé an pliss ni obliye la dète sé lo kontropoi lésploitassion bann péi blan la fé dsi bann moune lafrik é koman banna la dévast in bonpé péi lafrik pou grossi zot pla laba dann l’érop épi dann La franss.

A bon antandèr salu !

Justin