Lakey lo sit > Chroniques > Oté
« I gingn pa moush avèk lo né in n’ot ! »
In kozman pou la rout
samdi 6 avril 2019, sanm
Néna zafèr lé absurd é mi pans kozman-la lé bien absurd pou vréman. Zot i koné lir, zot i gingn konprann lé shoz donk la pa bézoin éspliké. In pti konpléman kant mèm : zot i souvien Pyèr Dac ? Sa lété in komik pou vréman. Son bann kozman té absurd la plipar d’tan. In zour li la ésplik l’avé si tèlman brouyar k’in moun la tronpé épi li la moush avèk lo né in n’ot pèrsone si tèlman demoun la antann in kriyé, final de kont lété sa moin la di azot an-o la. Astèr si ni di sa é in provèrb, ni pé dmandé dann kèl ka i mète ali mé san tro fatig mon koko mi oi in raproshman avèk nout kozman i di konmsa : « Kont pa dsi baton (sansa bato) tonton pou travèrs la rivyèr ». Mi kite azot rofléshi la dsi é ni artrouv pli dvan. Sipétadyé !