« I komanss viéyir lo zour i arète aprande ! »

Médame, méssyé, la sossyété, koze èk mwin sé koze èk in kouyon, mé sé o pyé d’lo mi k’i oi lo masson.

Mézami, kozman-la sa in provèrb zaponé é sanm pou mwin li di bien sak li vé dire… antouléka si wi konpran ali bien. Arète aprande, sa lé sir in zour sa i ariv : zour-la si wi travaye wi rèst an plass sansa wi rokil dann oute métyé.

Zour-la bande zafèr nouvo i intérèss pi aou, mèm i plé pi aou, si i fé pa pèr aout ou kour. Zour-la wi oi demoune la zénérassion d’apré ou i dépass aou par zot konéssans, sansa zot konète fère. Wi rande pa ou konte toutsuite, mé firamézir wi apèrsoi ou lé blizé ramé pou gingn fé lo mèm zafèr ké avan, sansa pou trouv in solission wi mète bonpé lo tan. Zour-la san rogarde oute léta sivil, wi romark ou la viéyi.

Mé alon bien kalkilé : i pé dire sak mwin la marke an-o la, mé kissa k’i di sa lé vré. Na pwin balanss pou pèze sa ! Na pwin lo mètr pou mézir sa ! La montr konékté i koné pa sa ! E si wi ranplass la kantité par la kalité ! Final de konte pèrsone i pé di si sa lé vré pou vréman, sof bienantandi si ou lé malade é oute nerone la fine gingn lo kou. Astère mi fini par in provèrb afrikin k’i di konmsa : lome jenn i marsh pli vite, mé lome azé i koné shomin.

Alé ! Mi kite azot rofléshi la dsi é ni rotrouv pli d’van. Sipétadyé.