Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi pans zot lété kontan antann mésyé Didier dann télé l’ot soir. Mi pans in pé mèm la pans so kou isi la vi l’apré donn azot rézon : l’otonomi i fé pi pèr pèrsone é i tard pa mésyé Didier i sava domann gouvèrnman l’otorizasyon pou li fé l’éspérimantasyon d’in n’afèr k’i rosanm konm in frèr avèk l’otonomi-donk lo pouvoir désid par nou mèm sak lé bon pou nou mèm. Moin lé sir zot i sar trouv in n’afèr pou krétiké la-dan. Mé ké zot i vé, é ké zot i vé pa, lo trin pou lo shanjman-konm i di dann fime-la fine sif troi foi. Tok ! Pran sa pou toi !

Justin la fé pou romark :

Mon vyé matant k’i koz touzour la boush rouvèr, si mi konpran bien sak ou i di, sak dann lo tan d’avan té i fé pèr zot tout konm lo lou blan, sak la fé kondane i bonpé nout militan, zordi i fé pi pèr azot. Zordi sé zot k’i rovandik nout z’idé a nou. Donk nout parti l’avé rézon avan toulmoun !

Mé antansyon i vé pa dir ditou ké bann moun la droit i vé lo mèm solisyon ké nou donk lo dévlopman nout l’ékonomi, donk la libèrté sosyal, donk nout l’idantité rényonèz é nout libérasyon kiltirèl avèk sa in vré protéksyon pou nout l’anvironeman é in politik i tienbo kont nout démografi é sèt bann péi lé z’alantour. Sak ni vé é sak bann droit i vé la pa ditou lo mèm z’afèr.

I konfonn pa po d’shanm la droit, avèk pla kouvèr nout parti. Tok ! Pran sa pou ou.